My Son David (Afrikaans version), Deborah Melissa Möller [best english novels for beginners .TXT] 📗
![](/uploads/posts/books/1/4/8/0/8/deborah-melissa-moeller-my-son-david-afrikaans-version.jpg)
- Author: Deborah Melissa Möller
Book online «My Son David (Afrikaans version), Deborah Melissa Möller [best english novels for beginners .TXT] 📗». Author Deborah Melissa Möller
Alle dank aan God die Vader, Sy Seun Jesus Christus en Sy Heilige Gees, vir hierdie taak wat aan my toevertrou is om die wil van die Vader te doen. Dankie dat ek reeds voor die grondlegging van die wêreld geroep is om te help om U Bruid uit te roep. Dankie vir U genade en barmhartigheid. Dankie dat U my God, my Vader, my Koning en my Helper is, want U inspireer en seën my daagliks.
Ek het U lief, Here!
Ek wil vir almal dankie sê wat daagliks vir my bid en altyd lief is vir my en my aanvaar vir wie ek is. Ek wil veral vir my familie en vriende dankie sê.
Baie dankie ook aan Adri Malan en Ellie Landman vir hulle hulp met die redigering van die boek.
Eer aan die Vader!
Eer aan die Seun!
Eer aan die Gees!
Hierdie Drie is Een!
INHOUDSOPGAWE
INLEIDING
HOOFSTUK 1: MY WARE DAWID’S
HOOFSTUK 2:..DIE HERE MAAK DIT SWAAR OM ‘N KONING TE WEES!
HOOFSTUK 3: KOM TE STAAN VOOR DIE REUSE
HOOFSTUK 4: GEHOORSAAMHEID
HOOFSTUK 5: MY PERFEKTE WIL
HOOFSTUK 6: WEES INTIEM MET MY
HOOFSTUK 7: ‘N OOP DEUR
HOOFSTUK 8: O DROЁ BENE, HOOOR DIE WOORD VAN DIE HERE!
HOOFSTUK 9: ONGEHOORSAAMHEID
HOOFSTUK 10: EK ROEP VIR EENHEID
GEBED
INLEIDINGDie Here het gesê dat hierdie boek ‘n waarskuwing sal wees vir diégene wat deur Hom geroep is, maar wat nie Sy roepstem in gehoorsaamheid geantwoord het nie, asook, waarom die Here diegene sal seën wat in gehoorsaamheid wandel, want Hy sal byvoeg by dié wat reeds het en sal wegneem by dié wat niks het nie.
“Ek is ernstig wanneer Ek jou roep om iets te doen. Ek sal jou gehoorsaamheid seën as Ek jou vra om iets te doen. Indien jy My Woord nalaat of ignoreer, sal Ek jou salwing, outoriteit en koningskap verwyder en dit vir iemand anders gee, wat My wel lief het en wat aan My gehoorsaam is. My Dawid’s sal ‘n dubbel porsie ontvang, omdat Ek die salwing, outoriteit en koningskap van die Saul’s verwyder het. Die Saul’s luister na en gehoorsaam mense. My Dawid’s luister na en gehoorsaam My. Gee aandag aan hierdie waarskuwing; wees ernstig oor My, wanneer Ek jou roep – jou antwoord sal bepaal wat jy in die ewigheid oes.
Kies! Wil jy My seun Dawid genoem word?”
DIE REIS
Op 20 Julie 2010, het die Here die volgende vir my gesê:
“Jy gaan ‘n boek skryf oor die eindtyd. Dit is jou skeppingsdoel.” Ek het ervaar dat die Here vir my sê dat dit nie maklik gaan wees nie omdat mense dit nie gaan aanvaar nie. Slegs die oorblyfsel uit die nasies (‘remnant’) gaan dit aanvaar. Die boek sal wees vir Sy Bruid, die oorblyfsel uit die nasies (‘remnant’). Die boek sal handel oor die voorbereiding vir die Koning se terugkeer en sodat dié wat nie weet nie, gewaarsku kan word. “Die boek sal ‘n geskenk vir My Bruid wees. Dit is vir diegene wat My liefhet, en wat na die waarheid soek, en uitroep: ‘Vertel ons meer, Here, net die waarheid, Here!’ Die boek sal oor Jesus handel. Jesus is die sleutel. Jesus moet julle fokus wees en Jesus is julle bestemming.”
Al hierdie is opgeneem in die eerste boek, Die Finale Roep, wat op 22 April 2011 begin het toe die Here my opdrag gegee het om alles neer te skryf wat Hy sê. Die tweede boek, Die Uittog, wat op 1 Julie 2011 begin het, openbaar hoe die Here Sy kinders uit Egipte (die wêreld) uitroep om vir die Beloofde Land (Millenium) voor te berei. Die boek wat jy in jou hand hou, My seun Dawid, is die derde boek.
Ek is slegs gehoorsaam om die wil van die Vader te doen. In 2009 het ek begin bid dat die Here my die absolute waarheid oor Hom en die eindtyd sal wys. Hy openbaar inderdaad die waarheid aan my. En, soos ek vryelik ontvang het, so moet ek vryelik gee.
HOOFSTUK 1: MY WARE DAWID’S
22 Augustus 2011
Ek sien skuiwe plaasvind. Groot strukture wat beweeg word, in plek beweeg word.
Ek vra die Here: “Here, wat is hierdie strukture en hoekom beweeg hulle?”
Die Here antwoord: “Al die strukture wat in plek beweeg word is die groot legkaart wat gepas word. Met alle mensegeskiedenis word die legkaart nou ‘n prent, nog nie 100% herkenbaar nie, maar die buitelyn is daar. Groot skuiwe sal nou op aarde begin plaasvind, om die legkaart van die menseras te voltooi.
Diegene met oop oë sal wonderlike en groot gebeure sien en sal deel daarin! Diegene wat My liefhet en My gehoorsaam, sal verheug wees daaroor, want My boek Openbaring sal voor hulle oë vervul en voltooi word. Wat ‘n bevoorregte geslag. Diegene wat teen My is, sal groot pyn en angs verduur oor wat naderend is op aarde.
Slegs deur My oë sal jy die rede sien waarom Ek al hierdie dinge toelaat om na die aarde te kom. Slegs diegene wat wakker is, sal die tekens van My koms ken, want sien, Ek kom gou. Geseënd is jy wat vervolg word ter wille van My Naam.”
VERVOLGING
“Wat is vervolging? As jy My liefhet, My gehoorsaam en saam met My stap, en as gevolg daarvan geoordeel word deur mense wat vol eiegeregtigheid, selfsugtige ambisie, trots en haat is omdat jy My liefhet, My kan hoor en My Woord verkondig as Ek jou beveel het: Dit is vervolging.
Kyk na My profeet Jeremia. Hy was My ware profeet. Hy het die waarheid gepraat en die waarheid gedoen soos Ek hom beveel het, maar eiegeregtige, selfsugtige mense van My het hom gehaat omdat hy die waarheid gepraat het. As gevolg van trots het hulle My nie in hom herken nie. Hulle het nie die waarheid in Jeremia herken nie. Dit is wat dit beteken om vervolg te word ter wille van My Naam.
Net so het soortgelyke mense binne My Liggaam die ware Dawid’s gestop. Julle trap op My ware Dawid’s. Die hart en karakter van Dawid wat Ek in baie van My seuns en dogters geplant het. Hierdie Dawid’s is Myne, want Ek het ‘n tafel vir hulle voorberei, te midde van hulle teenstanders. Want net goedheid en guns sal hulle volg al die dae van hul lewe.”
OORKOM DIE SISTEEM
“Nou is die tyd om My ware Dawid’s, My ware heersers en regeerders, bekend te maak, want My Dawid’s sal saam met My heers en regeer vir 1 000 jaar. My Dawid’s het dubbeld die porsie ontvang vir koningwees, want Ek het van Saul weggeneem en dubbeld aan My seun Dawid gegee.
Ek het jou lief, My seun Dawid, want jy weet in jou hart dat Ek jou geroep het as My ware koning voor My. Omdat jy My liefhet met jou hele hart, siel en verstand sal Ek jou oprig en hoog aanstel. Ek sal jou naam groot maak. Alle nasies sal jou naam ken, want Ek het jou naam in die stad van Dawid geskryf. Jy sal geliefd wees deur die mense en jy sal oor hulle heers met reg en geregtigheid omdat jy by My geleer het deur baie jare in die woestyn en deur baie jare onder die voete van die Saul’s.
Omdat jy rein gebly het te midde van groot boosheid, het jy groot guns in die oë van My Vader ontvang. My seuns (Dawid’s), daar is net ‘n paar jaar oor om julle op te lei om koning te word. Min jare oor, om julle te leer om ‘n koning voor My te word.
Julle sal hulle met ‘n ysterstaf regeer, indien julle oorwin. My seuns, hierdie, is ‘n groot toets om die sisteem van dominansie, manipulasie en beheer te oorwin. Indien julle wel oorwin, sal Ek aan julle die môrester gee.”
“En aan hom wat oorwin en my werke tot die einde toe bewaar, sal Ek mag oor die nasies gee, en hy sal hulle regeer met ‘n ysterstaf; soos erdegoed word hulle verbrysel, net soos Ek ook van my Vader ontvang het. En Ek sal hom die môrester gee. Wie ‘n oor het, laat hom hoor wat die Gees aan die gemeentes sê.” (Open. 2:26-29)
“My seuns, hierdie, is baie belangrik om te verstaan. Julle moet die sisteem oorwin. Ek is in geen sisteem nie. Ek leer nie dogma en valse leringe nie. Ek praat net die waarheid. Ek praat oor die Vader en die Vader praat oor My. Want Ons is die Waarheid. Tensy die fokus op My is, is die sisteem vals.
Ek, Christus, hou alles bymekaar. Moenie mislei word deur mense wat oor My praat en My Naam in hulle lering gebruik nie. Ek sal jou die waarheid vertel. Vra van My die waarheid. Vra van My om die ware toestand van iemand se hart te ontbloot. Ek sal jou die waarheid leer en wys as jy dit van My vra, want Ek is die enigste Hoof. Ek is die enigste Herder. Stap saam met My, want Ek sal alle waarheid aan jou bekendmaak.”
HOOFSTUK 2: DIE HERE MAAK DIT SWAAR OM ‘N KONING TE WEES!
Comments (0)